المعقول والمجتمعات

بيتهيألى الاخلاص لايدولوجية معينة بيعتمد بدرجة كبيرة على الاولويات او القيم اللى الانسان بيعظمها ويحطها فى المرتبة الاولى كمبدأ بيقيس عليه كل حاجة تقريبا
يعنى كل فكرة او مبدأ ممكن تبقى ايدولوجيا بقدر ما الانسان بيحطها مرجع ليه فى حياته
هتلر مثلا كان معتنق الفكرة ان فى فصائل و مجتمعات افضل من مجتمعات ولذلك فحسب البقاء للاقوى لابد انه يتم ابادة الضعيف حتى تأخذ الطبيعة مجراها وساعتها الخير هيعم علينا كلنا (كلنا المقصود به وهو بيتكلم لجمهوره ومستمعيه )
اختيار الفكرة الاولية دى لا يخضع لذرة من العقلانية فى شيئ حتى لو ظهر عكس ذلك فالتسلسل المنطقى والتركيب المنطقى متواجد فى اغلب الايدولوجيات لاحظ انى قلت التسلسل اما بداية اختيار الفكرة فغير منطقى
غالبا الفكرة الاولية بتتأثر باللاوعى (اللى هو غالبا مؤثرات وخبرات اتعرض ليها الانسان ساهمت فى تكوينه من غير ما يكون له دخل فى كده )
اللاوعى مش منطقى لكن بالدرجة الاولى هو عاطفى عشان كده الخبرات العاطفية فى الطفل وما يلى سنوات الطفولة من المراهقة وغيرها لها تأثير كبير على تركيب دماغ الانسان (بلاش نقول عقل عشان منخلطش المعقول واللامعقول )وكمثال فالطفل بيفهم ويأول ضرب ابوه ليه فى اغلب الاحيان على انه كره لدرجة ممكن توصل بيه انه ساعات كتير بيشتمه فى سره ومبيركزش الكلام المنطقى اللى ابوه بيحاول يوصله له كنصيحة وان الكلام فى مصلحته!!
 فى كتابه تاريخ الجنون فى العصر الكلاسيكى شدد ميشيل فوكو على العلاقة الوثيقة بين المعقول واللامعقول ودور اللامعقول تحديدا فى التاثير على المعقول
اللامعقول لم يكن متمثلا قط فى الجنون ولكن عوامل اخرى كتير يعنى مثلا استشهد باحد القساوسة وهو بيقتبس بكلام من الانجيل عشان يبرر تعذيب المتشردين والمجانين وما سواهم فى دور الحجز !!
وكثيرا ما يلتبس اللامعقول زى المعقول وخصوصا عندما يمتلك السلطة او القوة المتمثلة فى النفوذ او المال او اجتماع فئة ولو صغيرة على الاتفاق على هذه الفكرة لكنها تملك نفوذا كبيرا (ممكن نسميه الاجماع )
الاجماع فعلا مهم فى صبغ اللامعقول بالعقلانية اللى هى مش اكتر من مجرد اقتناع ببداهة الفكرة وكما يقول عابد الجابرى فى تكوين العقل العربى ” فالعقل كونى ومبادئه كلية وضرورية …….نعم . ولكن فقط داخل ثقافة معينة او انماط ثقافية متشابهة . وكما يقول لالاند نفسه فان العقل -المكوَّن- “ينزل منزلة المطلق من طرف اولئك الذين لم يكتسبوا فى مدرسة المؤرخين او مدرسة الفلاسفة الروح النقدية ” اولئك الذين يحكمهم العقل السائد الذى انتجه عقل اجدادهم الفاعل عقل ثقافتهم التى يعتبرونها الثقافة الوحيدة والممكنة او على الاقل العالم الثقافى الخاص بهم “